لاہور سٹیشن پر شالیمار ایکسپریس سے بھاری اسلحہ برآمد، 3 افراد گرفتار

لاہور (سٹاف رپورٹر+ آئی این پی) لاہور ریلوے سٹیشن پر کراچی جانے والی شالیمار ایکسپریس سے تین مسافروں کو گرفتار کرکے بھاری مقدار میں اسلحہ برآمد کر لیا۔  ریلوے حکام کے مطابق شالیمار ایکسپریس کے ذریعے کراچی جانے والے تین مسافروں کو اس وقت حراست میں لیا گیا جب وہ ٹرین میں غیر ملکی ساخت کا اسلحہ لوڈ کر رہے تھے۔ ریلوے پولیس نے گرفتار افراد سے تحقیقات شروع کر دیں۔ ملزمان نے واک تھرو گیٹس اور سی سی ٹی وی کیمروں کو بھی چکمہ دیکر قلیوں کی مدد سے اسلحہ سے بھرا بیگ ٹرین میں لوڈ کرایا تاہم شک پڑنے پر ریلوے پولیس کے اہلکاروں نے ملزموں کو روک کر بیگ کی تلاشی لی تو 28 نائن ایم ایم پستول، 7 کلاشنکوفیں، ایل ایم جی کی ایک ہزار گولیاں برآمد کر کے حارث، حافظ اسرار اور محمد شفیع کو حراست میں لیکر تفتیش کیلئے نامعلوم مقام پر منتقل کر دیا۔