اسلام آباد: ریڈزون سے مسلح شخص گرفتار

اسلام آباد(نوائے وقت رپورٹ) پولیس نے اسلام آباد کے ریڈزون میں واقع گلشن جناح میں ایک شخص سے پستول اور 32 گولیاں برآمد کرلیں۔ پولیس ذرائع کے مطابق گرفتار شخص کو تھانہ سیکرٹریٹ منتقل کردیا گیا ہے وہ ریڈ زون میں داخل ہونے کی کوشش کررہا تھا، اس سے پوچھ گچھ جاری ہے۔ اس شخص کا تعلق بلوچستان کے ضلع لورالائی سے ہے ۔دریں اثنا اسلام آباد میں ناظم الدین روڈ پر ایک گاڑی سے تین پستول برآمد کرلئے گئے ہیں۔ پولیس ذرائع کے مطابق پولیس کے روکنے پر کار سوار گاڑی چھوڑ کر فرار ہوگیا۔ وزیرداخلہ چودھری نثار کے حکم پر چینی صدر کے دورہ کے باعث وفاقی دارالحکومت کی سکیورٹی انتہائی سخت ہے، اضافی ناکے لگائے گئے ہیں۔