کراچی (کرائم رپورٹر) گلستان جوہر میں آتشزدگی کے نتیجے میں 10 جھونپڑیاں جل کر خاکستر جبکہ 2 بچے جھلس کر ہلاک ہو گئے۔ جامعہ کراچی کے قریب گلستان جوہر کے بلاک ون میں پہاڑی پر واقعہ جھونپڑیوں میں آگ بدھ کی دوپہر لگی جس کے بارے میں اطلاع ملتے ہی فائر بریگیڈ کے عملے نے موقع پر پہنچ کر آگ بجھانے کی کارروائی شروع کی تاہم تقریباً ایک گھنٹے کی جدوجہد کے بعد جس وقت آگ پر قابو پایا گیا اس وقت تک 10 جھونپڑیاں اور ان میں موجود سامان جل کر راکھ ہو چکا تھا جبکہ آگ کی لپیٹ میں آ کر 2 بچے بھی جاں بحق ہو گئے بچوں کی شناخت 2 سالہ یوسف اور 5 سالہ راشد کے ناموں سے ہوئی۔ فائر بریگیڈ حکام کے مطابق جھونپڑیوں میں آگ لگنے کی وجہ معلوم نہیں ہو سکی۔