محکمہ انسداد دہشتگردی (سی ٹی ڈی )اور رینجرز نے جامشورو کے قریب مشترکہ آپریشن کرکے سعید آباد پولیس ٹریننگ سینٹر پر خودکش حملے کا منصوبہ ناکام بنانے کادعوی کیا ہے اور 5 دہشتگردوں کو گرفتار کرلیا۔محکمہ انسداد دہشتگردی کے انچارج ڈی آئی جی عمر شاہد نے رینجرز کے کرنل شبیر کے ہمراہ پریس کانفرنس میں بتایا کہ جامشورو سے گرفتار دہشت گردوں کا سعید آباد پولیس ٹریننگ سینٹر میں خود کش حملے کا پلان تھا، انہوں نے پولیس ٹریننگ سینٹر کی ریکی کر لی تھی جب کہ ملزمان نے ٹریننگ سینٹر کی فوٹیج بھی بنا رکھی تھی۔عمر شاہد کے مطابق گرفتاردہشت گردوں میں دو خودکش حملہ آوربھی شامل ہیں جن سے 2 خودکش جیکٹ، سعید آباد ٹریننگ سینٹر کا نقشہ، موبائل فونز، سی ڈیز، پولیس یونیفارم اور اسلحہ برآمد کیا گیا ہے جب کہ دہشتگرد حملوں کے لیے خودکش جیکٹ فراہم کرتے تھے، یہ افغانستان سے ہوتے ہوئے پاکستان آئے تھے۔اس موقع پر رینجرز کے کرنل شبیر نے بتایا کہ دہشتگردوں سے تحقیقات میں اہم باتیں سامنے آئی ہیں،ملزمان طورخم کے راستے پاکستان آئے تھے، ان سے سعید آباد ٹریننگ سینٹر کی ریکی کی ویڈیوزبھی ملی ہیں۔