پاکستان ہاکی ٹیم کا دورہ یورپ، کھلاڑیوں کے اعلان میں تاخیر

لاہور(آئی این پی)پاکستان ہاکی فیڈریشن سلیکشن کمیٹی کی جانب سے دورہ یورپ کے لئے کھلاڑیوں کے ناموں کا اعلان مسلسل تاخیر کا شکار ہے۔ پی ایچ ایف  نے کہاہے کہ(آج)منگل کو ویزے  ملنے کی امید ہے،  یورپی ویزے ملنے کے بعد قومی ہاکی اسکواڈ کا اعلان کیا جائیگا۔واضح رہے کہ قومی ہاکی ٹیم کی 22 اپریل کو ہالینڈ روانگی کا شیڈول ہے، اس یورپی دورے میں پاکستان ٹیم چھ میچز کھیلے گی ، 26 اور 27  اپریل کو ہالینڈ کے خلاف میچز ہوں گے۔اس کے علاوہ 29 اپریل کو بلجئیم جبکہ 2، 3 اور پانچ مئی کو اسپین میں میچز ہوں گے۔پی ایچ ایف کا کہنا ہے کہ دورے کے لیے25  کھلاڑیوں کو شارٹ لسٹ کر لیا گیا، ویزوں کے بعد  کھلاڑیوں کی حتمی تعداد کا فیصلہ ہوگا۔