طور خم بارڈر : کنٹینرز پر تودہ گرگیا ،3 افراد جاں بحق ، 12 کو زندہ نکال لیا 

 پشاور+لنڈی کوتل (نوائے وقت رپورٹ+نامہ نگار) طورخم میں پاک آرمی کی اربن سرچ اینڈ ریسکیو ٹیموں نے ملبے تلے دبے تین افراد کی نعشیں جبکہ 12 افراد کو زندہ نکال لیا جن کی حالت خطرے سے باہر ہے۔ طورخم پر آرمی کی ریسکیو ٹیموں کا برق رفتار ریسکیو آپریشن تیزی سے جاری ہے۔ پاک آرمی، ریسکیو 1122 اور سول انتظامیہ کی مشترکہ ریسکیو کاوشیں جاری ہیں۔ آرمی انجینئرز کے متعدد ڈمپرز، ڈوزر اور دیگر آلات و مشینری متاثرہ علاقے سے ملبہ ہٹانے میں مصروف عمل ہیں۔ پاک آرمی کی اربن سرچ اینڈ ریسکیو ٹیموں نے اپنے مخصوص سرچ کیمروں، ریسکیو ریڈار، کٹرز، اور لائف لوکیٹرز کی مدد سے ملبے تلے دبے 3 افراد کی لاشیں جبکہ 12 افراد کو زندہ نکال لیا جن کی حالت خطرے سے باہر ہے۔4 نعشیں ملبہ تلے دبی ہونے کا اطلاع ہے پاک آرمی کی ریسکیو ٹیمیں ملبے تلے دبے آخری فرد کے انخلاءتک آپریشن جاری رکھنے کیلئے پرعزم ہیں۔