واشنگٹن (اے پی پی) عالمی نمبر ایک نوویک جوکووچ شکست کے بعد سنسناٹی ماسٹرز ٹینس ٹورنامنٹ مینز سنگلز سیمی فائنل میں شکست کے بعد ٹائٹل کی دوڑ سے باہر ہو گئے، ڈیوڈ گوفن اور ڈینل مدودوف فتوحات برقرار رکھتے ہوئے فائنل میں پہنچ گئے۔ اتوار کو امریکا میں جاری ایونٹ میں کھیلے گئے مینز سنگلز سیمی فائنلز میں روسی کھلاڑی ڈینل مدودوف نے عمدہ کارکردگی کا مظاہرہ کرتے ہوئے سربین کھلاڑی جوکووچ کو زبردست مقابلے کے بعد 3-6، 6-3 اور 6-3 سے شکست دے کر فائنل میں پہنچنے کا اعزاز حاصل کیا۔ بیلجیئم کے ڈیوڈ گوفن نے فرانس کے رچرڈ گیسکوئٹ کو 6-3 اور 6-4 سے ہرا کر فائنل تک رسائی حاصل کی۔ گوفن اور مدودوف کے درمیان فائنل آج پیر کو کھیلا جائے گا۔ سوتیلانا کزنٹسوا اور میڈیسن کیز نے پیش قدمی کے تسلسل کو برقرار رکھتے ہوئے سنسناٹی ماسٹرز ٹینس ٹورنامنٹ ویمنز سنگلز فائنل میں جگہ بنا لی۔ اتوار کو امریکا میں جاری ایونٹ میں کھیلے گئے ویمنز سنگلز سیمی فائنلز میں روسی کھلاڑی سوتیلانا کزنٹسوا نے عمدہ کارکردگی کا مظاہرہ کرتے ہوئے آسٹریلیا کے ایشلیگ بارٹی کو 6-2 اور 6-4 سے زیر کر کے فائنل میں جگہ بنا لی۔ امریکن کھلاڑی میڈیسن کیز نے ہم وطن کھلاڑی سوفیا کینن کو 7-5 اور 6-4 سے شکست دے کر فائنل کیلئے کوالیفائی کیا۔ جمی مرے اور نیل سکپ سکی پر مشتمل برطانوی جوڑی سنسناٹی ماسٹرز ٹینس ٹورنامنٹ مینز ڈبلز سیمی فائنل میں شکست کے بعد ٹائٹل کی دوڑ سے باہر ہو گئی۔