صلاح الدین عباسی نے سیاست سے دلبرداشتہ ہو کر لندن سکونت اختیار کر لی

احمد پور شرقیہ(نامہ نگار) سابق ریاست بہاولپور کے نواب صلاح الدین عباسی اپنے بیٹے اور ولی عہد پرنس بہاول عباسی کی حالیہ قومی الیکشن میں شکست کے بعد دل برداشتہ ہو گئے اور الیکشن کے بعد لندن میں مقیم ہو گئے ہیں اور عید بھی انہوں نے اپنے آبائی صادق گڑھ پیلس کی بجائے لندن میں گزاری اور عید نماز بھی مغربی لندن کی گریٹ مسجد میں ادا کی ہے جس پر خاندان عباسیہ کے خیرخواہوں اور ان کے سیاسی گروپ میں مایوسی پھیل گئی تاہم نوا ب صلاح الدین عباسی کے فرزند ولی عہد پرنس بہاول عباسی نے بھی صادق گڑھ پیلس کی بجائے لاہور میں سکونت کے لئے بنگلہ خریدا ہے اور مقامی عوامی سیاست میں نواب صلاح الدین عباسی کی گرفت زیرو ہو گئی ہے کیونکہ ان کے فرزند آبائی نشست پر ایم این اے کے الیکشن میں شکست کھا گئے تھے۔