نوجوان پارٹی کا مستقبل ، تیاری کرلیں نواز شریف جلد آپ کے درمیان ہونگے : مریم نواز 

لاہور (نوائے وقت رپورٹ) مریم نواز نے کہا نوجوان پارٹی کا مستقبل اور (ن) لیگ کی اصل طاقت ہیں۔ مریم نواز نے پنجاب کے صوبائی حلقوں کے یوتھ کوآرڈینیٹرز سے ملاقات کی۔ انہوں نے یوتھ کوآرڈینیٹرز میں نوٹیفکیشن بھی تقسیم کیے۔ انہوں نے کہا کہ نوجوانوں کو زندگی کے ہر شعبے میں ترقی ان کا حق ہے۔ اب دور نوجوانوں کا ہے، پارٹی ہر سطح پر یوتھ اور اس کے نمائندوں کو آگے بڑھنے کا موقع دے گی۔ آپ نے پارٹی کا پیغام گھر گھر پہنچانا ہے۔ مسلم لیگ ن نے ہر دور میں لیپ ٹاپ، انڈومنٹ فنڈز، یوتھ لون پروگرام اور کھیلوں کے میدانوں میں نوجوانوں کو آگے بڑھنے کے مواقع فراہم کئے۔ مسلم لیگ (ن) کے شیروں نے ہر موقع پر فرنٹ لائن پر اپنا رول ادا کیا۔ میاں نواز شریف نے جب بھی نوجوانوں کو کال دی انہوں نے اپنے قائد کی کال پر لبیک کہا۔ نوجوان تیاری کر لیں میاں نواز شریف جلد آپ کے درمیان ہوں گے۔ مریم نواز نے خطاب کرتے ہوئے مزید کہا فتنہ پارٹی نے نوجوانوں کے ذہنوں میں صرف نفرت اور انتشار پیدا کیا، اس کا عملی مظاہرہ قوم 2014ء کے دھرنے اور 9 مئی کے واقعات کی صورت میں دیکھ چکی۔ مریم نواز نے کہا فتنہ فساد گروپ نے پاکستان میں صرف اور صرف ڈنڈے اور گالی کی سیاست کو فروغ دیا۔
مریم نواز