فیروزوالہ( نامہ نگار)  لاہورفیصل آباد سیکشن پر جھامکے کے قریب 5 ڈاکو ریلوے پھاٹک مین عبدالغفار کو یرغمال بنا کر ریلوے کا لاکھوں روپے مالیت کا سامان اکھاڑ کر ویگن پر لاد کر لے گئے۔سامان میں آہنی گارڈرز اور ریلوے ٹریک والی پٹری شامل ہے جو جھامکے پھاٹک کے قریب ذخیرہ کی گئی تھی۔ اس سیکشن پر گذشتہ روز کے دوران ریلوے کی تنصیبات کی ڈکیتی کی دوسری واردات ہے۔ اس واردات کی اطلاع پا کر ڈسٹرکٹ پولیس اور ریلوے پولیس کے اعلیٰ حکام سمیت متعدد ریلوے افسران وہاں پہنچ گئے۔ صدر پولیس نے اس واردات کا مقدمہ درج کر لیا ہے۔گوجرانوالہ روڈ پر زیر تعمیر گول چوک کوٹ رنجیت میں 3 موٹرسائیکل سوارر ڈاکو شہری شبیر حسین سے گن پوائنٹ پر 5 لاکھ روپے اور قیمتی موبائل چھین کر فرار ہو گئے۔ لاہور روڈ جوئیانوالہ موڑ کے قریب ڈاکووں نے ممتاز حسین سے ایک لاکھ روپے چھین کر فرار ہوگئے۔