لاہور(سپورٹس رپورٹر)لاہور اوپن پولو چیمپئن شپ کا فائنل دلچسپ مقابلے کے بعد حبیب میٹرو لائنز نے جیت لیا۔ لاہور پولو کلب میں کھیلے جانے والے فائنل میچ میں حبیب میٹرو لائنز نے باڑیز کی فیورٹ ٹیم کو 5-2 سے شکست دیدی۔ جبکہ سب سڈری فائنل میں الائیڈ بینک کی ٹیم نے بی بی جے پولو ٹیم کو 8-4 سے ہرایا۔ تفصیلات کے مطابق لاہور اوپن پولو چیمپئن شپ کا فائنل میچ کے آغاز میں ہی احمد علی ٹوانہ نے پہلے چکر میں دو گول کرکے اپنی ٹیم کو برتری دلا دی۔ باڑیز کی ٹیم نے واپس کم بیک کیا اور راجہ سمیع اللہ اور حمزہ مواز خان نے ایک ایک گول سکور کرکے میچ برابر کردیا۔ تیسرے اور چوتھے چکر میں حبیب میٹرو لائنز کی طرف سے سید آن رضوی نے ایک خوبصورت گول جبکہ راجہ تیمور ندیم نے دو گول سکور کیے۔
ادھر الائیڈ بینک نے بی بی جے پولو ٹیم کو 8-4 ہرا کر سب سڈری فائنل جیت لیا۔ میچ کے مہمان خصوصی وفاقی وزیر تجارت خرم دستگیر خان تھے جنہوں نے کھلاڑیوں میں انعامات تقسیم کیے۔