فیروزوالہ+ شیخوپورہ (نامہ نگار+ نمائندہ خصوصی) جی ٹی روڈ کی آبادی منوں آباد (کالا شاہ کاکو) میں سلنڈر گیس سے گیس لیک ہو جانے سے زوردار دھماکہ کیساتھ پھٹ گیا۔ 21 مہمانوں سمیت 23افراد جھلس گئے جن کو طبی امداد کیلئے ہسپتال داخل کروا دیا گیا جن میں چھ کی حالت نازک بیان کی جاتی ہے۔ بتایا جاتا ہے کہ کوٹ ماہی والا ( منوں آباد) میں شبیر حسین کا بھائی فوت ہو گیا تھا   افسوس کیلئے ان کے رشتہ دار ان کے ہاں آئے ہوئے تھے۔ سردی کی شدت کی وجہ سے مہمانوں کیلئے شبیر احمد نے گیس سلنڈر چلایا تو گیس لیک ہو جانے کے باعث گھر میں بھر گئی اور آگ لگاتے وقت زور دار دھماکہ ہو گیا جس کے نتیجہ میںیہاں آئے 11بچوں سمیت 23افراد جھلس گئے۔ اس دوران گھر میں پڑا ہوا سامان بھی جل گیا۔ زخمی ہونے والوں میں شبیر احمد، مشتاق احمد ، سمیع اللہ، سرفراز، ثقلین، ثمر، الیاس، شوکت علی، کشور بی بی، رضیہ بی بی، آسیہ بی بی اور دیگر شامل ہیں۔ ریسکیو کے عملے نے زخمیوں کو طبی امداد کیلئے مریدکے اور لاہور ہسپتال منتقل کیا ۔ واقعہ کی اطلاع ملنے پر ڈی ایس پی  افتخار احمد وریا، اور ایس ایچ او سٹی مریدکے ولی حسن پاشا پولیس نفری کے ہمراہ جائے وقوعہ پر پہنچ گئے اور شواہد اکٹھے کرکے تحقیقات شروع کر دیں۔ رپورٹ بھی درج کر لی گئی ہے۔