نابلس (این این آئی)فلسطین کے مقبوضہ مغربی کنارے کے شمالی شہروں نابلس اور قلقیلیہ میں قابض اسرائیلی فوج اور یہودی آباد کاروں کے پرتشدد حملوں میں 154 فلسطینی زخمی ہو گئے ۔ میڈیارپورٹس کے مطابق ہلال احمر فلسطین کے مطابق تنظیم کے طبی عملے نے نابلس میں بیتا، بیت دجن اور برقہ جب کہ قلقیلیہ میں کفر قدوم کے مقام پر 154 فلسطینیوں کو طبی امداد فراہم کی۔بیان میں کہا گیا کہ اسرائیلی فوج نے ہلال احمر کی ایمبولینس پر بھی فائرنگ اور آنسوگیس کی شیلنگ کی جس کے نتیجے میں اسے نقصان پہنچا۔ادھر اسرائیلی فوج کی ریاستی دہشت گردی کے خلاف بیتا اور جبل ابو صبیح کے مقامات پر فلسطینیوں نے مظاہرے کیے اور اس علاقے میں یہودی آباد کاری کے خلاف احتجاج کیا۔ادھر کفر قدوم میں سترہ سال سے بند شاہراہ کھولنے کے لیے ہفتہ وار ریلی میں سیکڑوں فلسطینیوں نے شرکت کی۔ قابض فوج نے مظاہرین کو منتشر کرنے کے لیے ان پر لاٹھی چارج کیا اور آنسوگیس کی شیلنگ کی۔