کراچی(اسپورٹس رپورٹر ) سابق ٹیسٹ کپتان اور اپنے دور کے عظیم بیٹسمین جاوید میاندادنے کہا ہے کہ  پنجاب میں کرکٹ ہو رہی ہے اور کراچی کو کوئی نہیں پوچھ رہا۔میڈیا سے گفتگو کرتے ہوئے جاوید میانداد نے کہا کہ کورونا کی وجہ سے مشکلات تو آتی ہیں، مجھ سے پی سی بی نے کوچنگ کیلئے کوئی رابطہ نہیں کیا، میں خود پی سی بی سے کبھی رابطہ نہیں کروں گا، پی سی بی میں ہم بھی رہے ہیں، اس انتظامیہ کو کچھ معلوم نہیں، اسے اپنا نظام درست کرنے کی ضرورت ہے۔جاوید میانداد نے کہا کہ سرپرست کوئی بھی ہو، پی سی بی انتظامیہ میں کھلاڑیوں کو لانا چاہیے، پاکستان میں ڈراپ ان پچ کی ضرورت نہیں، ہم بھی ان پچز پر کھیل کر ورلڈ کلاس کھلاڑی بنے، پاکستان میں ہر قسم کی پچ بنتی ہے، پنجاب میں کرکٹ ہو رہی ہے اور کراچی کو کوئی نہیں پوچھ رہا۔انہوں نے کہا کہ عمران خان سے پہلے رابطہ تھا اب رابطہ نہیں، جو بھی حکومت میں آتا ہے، بڑی بڑی باتیں کرتا ہے، حکومت کو کھیلوں پر سرمایہ کاری کرنی چاہیے، نوجوانوں کو کھیل کی طرف راغب کرنے کی ضرورت ہے، بابر اعظم اور محمد رضوان کو پیغام ہے پرفارمنس کو بھول کر اگلے دن پر توجہ دیں۔