’’بابر اعظم نے 8 پلیئرز کا گروپ بنا رکھا ہے‘‘ ذکاء اشرف کی آڈیو لیک شاداب‘ حسن علی کا بھی ذکر

لاہور (سپورٹس رپورٹر) پی سی بی مینجمنٹ کمیٹی کے چیئرمین ذکاء اشرف کی ایک مبینہ آڈیو لیک ہوگئی ہے جس میں وہ نامعلوم خاتون سے کہہ رہے ہیں کہ بابراعظم نے 8 پلیئرز کا گروپ بنا رکھا تھا۔ انہیں ٹیسٹ ٹیم کا کپتان بننے کیلئے کہا تھا۔ نامعلوم خاتون کہتی ہے کہ ہم شائقین ہیں ہم دیکھتے ہیں کہ کپتان اپنے دوستوں اور اپنے قریبی لوگوں کو کھلانا شروع کردیتے ہیں۔ شاداب کی ٹیم میں کوئی جگہ نہیں بنتی۔ خاتون کے جواب میں مبینہ طور پر ذکا اشرف کہتے ہیں اس وجہ سے پاکستان کرکٹ خراب ہورہی ہے۔ مبینہ آڈیو میں ایک اور نامعلوم شخص کہتا ہے کہ حسن علی کا بھی تو ایسا ہی تھا۔ وہ ورلڈ کپ کھیل گیا۔ نامعلوم شخص کی بات کی نفی کرتے ہوئے خاتون کہتی ہے نہیں نہیں حسن تو اس لئے تھا کہ نسیم شاہ نہیں تھا ناں۔