لاہور(سپورٹس رپورٹر) پاکستان نژاد برطانوی باکسر عامر خان نے کہا ہے کہ برطانوی حریف کیل بروک کو ہار کا مزا چکھاؤں گا، ضروری ہے کہ کیل بروک کو اْس کی جگہ دکھائی جائے۔ وہ آج شام اپنے حریف کیل بروک کے خلاف رنگ میں اْتریں گے۔ انھوں نے کہا یہ فائیٹ برطانیہ کی بڑی فائٹ ہے، کیل بروک بہت باتیں کرتے ہیں، اب رنگ میں اْن کو جواب دوں گا، اور انھیں ایک ایسی شکست سے دوچار کروں گا جو انھوں نے پہلے کبھی نہ دیکھی ہوگی۔عامر خان نے اعتراف کیا کہ دونوں میں سے کوئی بھی ہار گیا تو اْس کیلئے شکست کیساتھ زیادہ دیر گزارہ مشکل ہو جائیگا، میں نے شکست اپنے ذہن میں ڈالی ہی نہیںہے، کیونکہ میں نے صرف جیتنا ہے، اگر میں فائٹ ہار بھی گیا تو میرا باکسنگ سے ریٹائرمنٹ لینے کا کوئی ارادہ نہیں۔میں بہت مضبوط اور خود کو بہت تازہ محسوس کر رہا ہوں، اس مقابلے میں فتح میری ہوگی، مقابلہ جیتنے کیلئے میں نے ہر طرح سے ٹریننگ کی ہے۔