اسلام آ باد+لاہور (نمائندہ خصوصی +کامرس رپورٹر) مہنگائی میں پسے عوام پر ایک اور بم گرادیا گیا ۔ یوٹیلیٹی سٹورز پر مختلف برانڈز نے اپنی قیمتوں میں اضافہ کر دیا ۔ یوٹیلٹی سٹورز کارپوریشن نے قیمتوں میں اضافے کا نوٹیفکیشن جاری کردیا ہے۔ نوٹیفکیشن کے مطابق ملک بھر میں یوٹیلیٹی سٹورز برانڈز نے اپنی قیمتوں میں اضافہ کر دیا ہے۔ متعدد اشیاء کی قیمتیں بڑھادی گئی ہیں۔ قیمتوں میں اضافے کا اطلاق فوری طور پر لاگو ہو گا۔ نوٹیفکیشن کے مطابق برانڈڈ کارن آئل کی فی لیٹر قیمت میں 300 روپے تک اضافہ کرکے آئل کی فی لیٹر قیمت 1170 روپے کر دی گئی ہے۔ اس کے علاوہ بچوں کے 800 گرام فارمولا مِلک کی قیمت 820 روپے تک بڑھا کر 4 ہزار 445 روپے کر دی گئی ہے۔ 330 گرام سیریل 450 روپے تک مہنگا ہوکر 1198 روپے ہوگیا ہے۔ ایک لیٹر فروٹ جوس 70 روپے تک مہنگا ہوا ہے،  336 گرام نوڈلز 60 روپے تک مہنگی ہوکر 425 روپے کی ہوگئی ہے۔ نوٹیفکیشن کے مطابق 800 گرام کیچپ کی قیمت میں 50 روپے تک اضافہ کیا گیا ہے۔ بچوں کے ڈائپرز کی قیمتوں میں 350 روپے تک کا اضافہ ہوا ہے۔ 650 ملی لیٹر شیمپوکی قیمت میں 210 روپے تک اضافہ ہوا ہے، ایک کلو کپڑے دھونے کا پاڈر 59 روپے تک مہنگا ہوگیا ہے۔130 گرام صابن 30 روپے، ہینڈ واش 21 روپے، ٹوائلٹ رول 10 روپے، ٹشو پیپرکا ڈبہ 43 روپے تک مہنگا ہوگیا۔ یوٹیلیٹی سٹورز پر باڈی واش،گارلک ساس، چکن، چیز نوڈلز کی قیمتوں میں بھی اضافہ کردیا گیا ہے۔