لاہور (سپورٹس رپورٹر) پاکستان کرکٹ بورڈ نے 11ویں سا¶تھ ایشین گیمز کیلئے 14 رکنی قومی انڈر 21 ٹیم کا اعلان کر دیا ہے۔ عمر امین ٹیم کے کپتان جبکہ گلریز صدف نائب کپتان ہونگے۔ قومی سلیکشن کمیٹی نے گذشتہ روز چیئرمین پی سی بی اعجاز بٹ کی منظوری کے بعد ٹیم کا حتمی اعلان کیا اور پاکستان اولمپک ایسوسی ایشن کو فہرست بھجوا دی۔ ٹیم کے ساتھ 5 آفیشلز بھی ڈھاکہ جائیں گے۔ نعیم اختر گیلانی منیجر جبکہ محمد اعظم خان کوچ ہونگے۔ 14 رکنی قومی سکواڈ میں عمر امین، علی اسد، تیمور علی، رمیز عالم، علی وقاص، عادل امین، شعیب خالق، گلریز صدف، کامران حسین، محمد رمیز، حسن ڈار، جنید خان، احسن جمیل اور نیئر عباس شامل ہیں۔ دیگر آفیشلز میں ریاض احمد فزیو، عمر فاروق انالسٹ اور ابرار احمد ٹرینر ہوں گے۔