جنین: اسرائیلی فوج سے جھڑپ میں فلسطینی نوجوان شہید‘ 2 صہیونی فوجی زخمی

جنین (اے این این+ اے ایف پی) دریائے اردن کے مغربی کنارے کے شمالی شہر جنین میں فلسطینی مزاحمت کاروں اور اسرائیلی فوج کے درمیان جھڑپ میں ایک فلسطینی شہید اور دو اسرائیلی فوجی زخمی ہوگئے۔فلسطینی ذرائع کے مطابق جنین میں ایک مسلح جھڑپ میں اسرائیلی فوج کی فائرنگ کے نتیجے میں ایک فلسطینی نوجوان شہید جب کہ دو قابض فوجی زخمی ہوگئے۔ ایک زخمی فوجی کی حالت تشویشناک بیان کی جاتی ہے ۔فلسطینی ذرائع ابلاغ اور وزارت صحت کے مطابق اسرائیلی فوج کی فائرنگ سے شہید ہونے والے نوجوان کی شناخت احمد نصر جرار کے نام سے کی گئی ہے جس کی عمر 22 سال بتائی جاتی ہے۔ اسرائیلی فوج نے اس پر نابلس کے ایک مزاحمتی سیل کی قیادت کا الزام عائد کیا گیا ہے۔مقامی شہریوں کا کہنا ہے کہ گزشتہ شام جنین میں ہونے والی جھڑپ میں اسرائیلی فوج کے جنگی طیاروں نے بھی مانیٹرنگ کی اور دونوں طرف سے شدید فائرنگ کا سلسلہ کئی گھنٹے تک جاری رہا۔