عالمی عشرہ عزائے فاطمیہ ؑکا آغازآج ، مجالس عزا،ماتمی جلوسوں کاانعقادکیاجائیگا

اسلام آباد(نیوزڈیسک) قائد ملت جعفریہ آغا سید حامد علی شاہ موسوی کے اعلان کے مطابق خاتونِ جناں حضرت سیدہ فاطمہ زہرا سلام اللہ علیہا کی شہادت کے سلسلے میں 23 جمادی الاول تا3جمادی الثانی ’’عالمی عشرہ عزائے فاطمیہ ‘‘ کاآغازاتوار کو ہوجائیگا۔ اس ضمن میں انتظامات کی نگرانی کیلئے ٹی این ایف جے کی کمیٹی نے اندرون و بیرون ملک کنوینر مقرر کر دیئے ہیں ۔ہفتہ کو ڈاکٹر ایس زمان کی صدارت میںعالمی عشرہ عزائے فاطمیہ ؑ کمیٹی کا اجلاس منعقد ہوا جس میں پروگراموں کے انتظامات کا جائزہ لیا گیا۔اجلاس میں حکومت سے مطالبہ کیا گیاکہ وہ عالمی عشرہ عزائے فاطمیہ ؑ کے دوران خصوصی حفاظتی انتظامات کرے ، ذرائع ابلاغ پروگراموں کی بھرپور کوریج دیں۔ ڈاکٹرایس زمان نے اہل اسلام سے اپیل کی کہ’’ عشرہ عزائے فاطمیہؑ ‘‘ کے پروگراموں میں بھرپور شرکت کرکے حضور ؐ اکرم کو انکی لخت جکر حضرت فاطمہ زہر ا ؑکی تعزیت و پرسہ پیش کریں،علمائے کرام ،ذاکرین عظام اور خطباء حضرات خاتون جنت ؐ کی سیرت و کردار کو اجاگر کریں۔