عراقی فوج نے دوران آپریشن داعشی مفتی ابو عبدالباری کو گرفتار کرلیا

بغداد(این این آئی)عراق کی سیکیورٹی فورسز نے موصل میں ایک کارروائی کے دوران داعش کے مفتی اور انتہائی خطرناک دہشت گرد شفاء النعمہ المعروف ابو عبدالباری کو گرفتار کر لیا ہے۔عرب ٹی وی کے مطابق عراقی فوج کے شعبہ اطلاعات کی طرف سے فیس بک پر پوسٹ کردہ ایک بیان میں بتایا گیاکہ سیکیورٹی فورسز نے موصل میں سرچ آپریشن کے دوران داعش کے مفتی اور ایک خطرناک دہشت گرد گو ابو عبدالباری کو گرفتار کرلیا۔بیان میں مزید کہا گیا کہ ابو عبدالباری ایک خطرناک شدت پسند ہے جو موصل کی مختلف مساجد میں امامت اور خطابت بھی کرتا رہا ہے۔ وہ اپنی تقریروں میں سیکیورٹی فورسز کے خلاف نفرت انگیز تقاریر کی وجہ سے بھی مشہور ہے۔