موڑکھنڈا: سابقہ رنجش پر مخالفین نے فائرنگ کر کے ایک شخص کو قتل کر دیا

موڑکھنڈا(نامہ نگار) سابقہ رنجش پر مخالف پر فائرنگ سے ایک شخص ہلاک اور ایک زخمی ہو گیا، مقتول کی چند روز قبل ہی شادی ہوئی تھی۔ بتایا جاتا ہے کہ تھانہ مانگٹانوالہ کے نواحی گاوں ٹھٹی سراواںکے رہائشی فخر السلام اور فیصل کے درمیان پرانی رنجش تھی ۔ پولیس ذرائع کے مطابق بتایا جاتا ہے کہ فخرالسلام نے کچھ عرصہ قبل فیصل کی بہن کو گھر سے بھگا لیا تھا اور بعد ازاں برادری کے دباو پرمبینہ طور پر لڑکی واپس کر دی تھی۔ مگرلڑکی کے بھائیوں نے غیرت کے نام پر اپنی بہن کو قتل کر دیا اور فخرالسلام کے متعلق رنجش دل میں رکھی۔اسی رنجش پر گزشتہ روز فیصل نے اپنے ساتھیوں کے ہمراہ فخر السلام کاتعاقب کر کے اس پر فائرنگ کر دی جس پر اس نے ٹھٹھہ لہنا کے محبوب کے گھر پناہ لی مگر انھوں نے محبوب کے روکنے پرفائرنگ کر دی جس کی زد میں آکر فخرالسلام گولیاں لگنے سے موقع پر ہی ہلاک ہو گیا جبکہ محبوب شدید زخمی ہو گیا۔ملزما ن فائرنگ کرتے ہوے فرار ہو گئے۔ مانگٹانوالہ پولیس مصروف تفتیش ہے۔