چوبرجی کوارٹرز: 46لاکھ‘ سندر: فوڈ چین برانچ میں 10لاکھ کی ڈکیتی

لاہور (نامہ نگار) لاہور کے مختلف علاقوں میںڈاکوئوں اور چوروں نے وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ تفصیلات کے مطابق ڈاکوؤں نے سمن آباد کے علاقے میں نوازکے گھر گھس کر اہلخانہ کو گن پوائنٹ پر یرغمال بنا کر 5لا کھ90ہزار روپے مالیت، ستوکتلہ کے علاقہ میں تنویرکے گھر سے 4لا کھ 80ہزار روپے مالیت، مسلم ٹائون کے علاقہ میںصادق کے گھر سے 3لا کھ40ہزار روپے مالیت، نواں کوٹ کے علاقہ میں معین اور اس کی فیملی سے 3لاکھ 5ہزار روپے مالیت، فیصل ٹائون کے علاقہ میں صابر کی فیملی سے2لاکھ 75ہزار روپے مالیت، غازی آباد میں طاہرکے گھر سے2لا کھ روپے مالیت، لٹن روڈ کے علاقہ میں مجیدکی فیملی کو یرغمال بنا کرڈیڑھ لا کھ ر روپے مالیت  کی نقدی، طلائی زیورات، موبائل فون اور دیگر سامان لوٹ لیا ہے۔ ڈاکوؤں نے شہر کے مختلف علاقوں میں راہزنی کی4 وارداتوں میں شہریوں سے  ہزاروں ر وپے نقدی اور موبائل فون لوٹ لئے ہیں۔ چوروں نے گارڈن ٹاؤن اور گلشن راوی کے علاقوں سے دوگاڑیاں جبکہ نواں کوٹ، مصری شاہ ، مزنگ اور گلبرگ کے علاقوں سے چار موٹر سائیکلیں چوری کر لی ہیں۔ سندر کے علاقے میں ڈاکوؤں نے معروف انٹرنیشنل فوڈ چین برانچ میں گھس کر فون اور انٹرنیٹ تار کاٹ دئیے اور عملہ کو تشدد کا نشانہ بناتے ہوئے ایک جگہ جمع کیا اور عملے کی تلاشی کے دوارن نقدی اور موبائل فون چھین لئے جبکہ ڈاکوؤں نے کاؤنٹر سے سیل کی رقم 10 لاکھ روپے رقم لوٹ لی اور فرار ہو گئے ہیں۔ عینی شاہدین کے مطابق واردات کے دوران ہی پولیس کو اطلاع کر دی گئی اور ڈولفن اہلکار مین گیٹ پر آ کر کھڑے ہو گئے مگر ڈر کے مارے اندر ہی نہ آئے۔ اس دوران ڈاکو باآسانی پچھلے دروازے سے فرار ہو گئے۔ نشتر کالونی کے علاقے میں دو ڈاکو شہری محبت علی کو گن پوائنٹ پر یرغمال بنا کر لوٹنے لگے تو محبت علی نے مزاحمت کر دی۔ جس پر ایک ڈاکو کی فائرنگ کی زد میں آکر محبت علی اور ڈاکو کا اپنا ساتھی اظہر شدید زخمی ہو گئے جبکہ فائرنگ کرنے والا ڈاکو موقع سے فرار ہو گیا۔ اطلاع ملنے پر پولیس اور امدادی ٹیمیں موقع پر پہنچ گئیں۔ زخمی شہری محبت علی اور زخمی ڈاکو اظہر کو طبی امداد کے لئے ہسپتال منتقل کر دیا گیا۔ پولیس کے مطابق گرفتار زخمی ملزم اظہر انسداد دہشتگردی، قتل سمیت 2 درجن سے زائد مقدمات میں پولیس کو مطلوب تھا جبکہ اس کے فرار ہونے والے ساتھی ڈاکو حمزہ کی گرفتاری کے لیے چھاپے مارے جا رہے ہیں۔ لٹن روڈ کے علاقے میں ملتان روڈ پر چوبرجی کوارٹرز کے  قریب  موٹرسائیکل سوار دو ڈاکوؤں نے وسیم رضا کو گن پوائنٹ پر یرغمال بنا کر اس سے 46 لاکھ روپے مالیت کی نقدی، سونا اور موبائل فون لوٹ لیا اور فرار ہوگئے۔ وسیم رضا چوک یتیم خانے میں گولڈ لیبارٹری سے 475 گرام سونا اور 5لاکھ روپے رقم لے کر دھوبی منڈی پرانی انارکلی جا رہا تھا کہ اس کے ساتھ واردات ہوگئی۔