نئی دہلی (نوائے وقت رپورٹ) ممبئی میں لنگر انداز بھارتی جنگی بحری جہاز میں دھماکا ہوا جس کے نتیجے میں نیوی کے 3 اہلکار ہلاک اور 10 زخمی ہوگئے۔ بھارتی بحریہ کی جانب سے جاری بیان کے مطابق ’آج ممبئی کے نیول ڈاکیارڈ میں کھڑے آئی این ایس رنویر کے ایک اندرونی حصے میں دھماکا ہوا۔ عملے نے مستعدی کا مظاہرہ کرتے ہوئے صورتحال کو قابو میں کرلیا، جہاز کو کوئی بڑا نقصان نہیں ہوا۔ بھارتی میڈیا کے مطابق آئی این ایس رنویر 1986 میں بھارتی بحریہ کے بیڑے میں شامل ہوا تھا۔ بھارتی بحریہ کا کہنا ہے کہ واقعے کی تحقیقات کیلئے بورڈ قائم کردیا گیا ہے جو ہر پہلو سے جائزہ لے کر اپنی رپوٹ پیش کرے گا۔