ورلڈ کپ کیلئے کوالیفائی کرنا ہدف خامیوں پر جلد قابو پا لیں گے :شہباز سینئر

لاہور(سپورٹس رپورٹر) پاکستان ہاکی فیڈریشن کے سیکرٹری شہباز سینئر کا کہنا ہے کہ ورلڈکپ کیلئے کوالیفائی کرنا ہدف ہے۔ میڈیا سے گفتگو کرتے ہوئے شہباز سینئر نے کہاکہ قومی سینئر ٹیم کا تربیتی کیمپ نیشنل سٹیڈیم میںجاری ہے، اذلان شاہ ہاکی ٹورنامنٹ میں کھلاڑیوں سے جو غلطیاں ہوئی اس سمیت کھلاڑیوں کی خامیوں کو دور کیا جائیگا ۔ اولمپک گیمز اور ورلڈ کپ جیسے میگا ایونٹ میں پاکستان کے کوالیفائی نہ کرنے کے حوالے سے ایک سوال کے جواب میں شہباز سینئر نے کہاکہ فیڈریشن ماضی کی غلطیوں میں نہیں جانا چاہتی ، ہم نے بریگیڈئر (ر) خالد سجاد کھوکھر کی قیادت میں اپنی تمام توجہ قومی کھیل کی بحالی اور ترقی پر مرکوز کی ہوئی ہے اور سینئر ٹیم کا پہلا ٹارگٹ ہاکی ورلڈ کپ کیلئے کوالیفائی کرنا ہے جس کا کوالیفائنگ راونڈ آئندہ سال کھیلا جائیگا ۔ انہوں نے کہاکہ فیڈریشن نے کھلاڑیوں کی فٹنس اور کارکردگی کو خصوصی طور پر فوکس کیا ہوا ہے۔