شاہنواز بھٹو کی 33 ویں برسی منائی گئی زرداری اور بلاول کا خراج عقیدت

لاہور+ اسلام آباد (خبر نگار+ ایجنسیاں) پیپلز پارٹی کے بانی اور سابق وزیراعظم ذوالفقار علی بھٹو کے چھوٹے صاحبزادے شاہنواز بھٹو کی 33 ویں برسی گزشتہ روز منائی گئی۔ اس سلسلے میں پیپلز پارٹی کے زیراہتمام مختلف تقاریب کا اہتمام کیا گیا جس میں شاہنواز بھٹو کو خراج عقیدت پیش کیا گیا۔ دریں اثنا چیئرمین پی پی پی بلاول بھٹو زرداری اور آصف علی زرداری نے شہید شاہنواز بھٹو کے 33ویں یوم شہادت پر خراج عقیدت پیش کرتے ہوئے کہا ہے کہ شہید شاہنواز بھٹو جوانی میں ضیا الحق کی آمریت سے لڑتے ہوئے شہید کردئیے گئے۔ شاہنواز کی پرامن جمہوری جدوجہد ضیاالحق کی آنکھوں میں کھٹکتی رہی۔ شہید شاہنواز بھٹو کی جدوجہد اور قربانی صدیوں یاد رکھی جائیگی۔ شہید شاہنواز بھٹو کارکنوں کے دماغ اور دلوں میں بستے ہیں۔