موٹر سائیکل حادثے ، گاڑیاں ٹکراگئیں کرک میں 7 افراد سمیت 14 جاں بحق

دینہ‘ ٹوبہ ٹیک سنگھ‘ کرک‘ ڈیرہ اسماعیل خان (نامہ نگاران + نوائے وقت رپورٹ + اے پی پی) دینہ کے نواحی علاقہ کلرا کے مقام پر راولپنڈی سے پھڈیال جانے والی کوچ نے موٹر سائیکل کو ٹکر دے ماری۔ جس سے موٹر سائیکل پر سوار ایک نوجوان موقع پر ہی جاں بحق ہو گیا جبکہ دوسرے کو شدید زخمی حالت میں ہسپتال منتقل کیا گیا۔ مگر وہ بھی  دم توڑ گیا۔ متوفی اویس ولد لیاقت علی کا تعلق محلہ حافظ آباد اور محمد آفاق ولد صفدر حسین کا سوہاوہ سے تھا۔ ٹوبہ ٹیک سنگھ سے نامہ نگار کے مطابق تیز رفتار مسافر بس آہنی گارڈر ٹی آرز سے لوڈ ٹریلر سے ٹکرا گئی۔ تین مسافر موقع پر جاں بحق جبکہ 12شدید زخمی ہوگئے۔ مسافر بس فیصل آباد سے وہاڑی جا رہی تھی۔ رجانہ سمندری روڈ پر اڈہ پھلور کے قریب ٹریلر سے ٹکرا گئی۔ جاوید حیدر، محمد ابرار اور ایک نامعلوم مسافر موقع پر ہی جاں بحق ہوگئے۔ باقی زخمیوں کو ریسکیو ٹیموں نے ڈسٹرکٹ ہیڈ کوارٹر ہسپتال منتقل کردیا۔ کرک سے نوائے وقت رپورٹ کے مطابق رنگین آباد چوک کرک کے قریب ٹرک اور مسافر وین میں تصادم ہوا۔ ٹریفک حادثے میں 7 افراد جاں بحق، 8 زخمی ہوگئے۔ زخمیوں کو ہسپتال منتقل کر دیا گیا۔ زخمیوں میں کچھ کی حالت نازک ہے۔ مسافر وین پشاور جارہی تھی۔ ڈیرہ اسماعیل خان سے اے پی پی کے مطابق تھانہ درابن کی حدود ڈیرہ درابن روڈ پر واقع بڑی سوانٹر پل سگو کے قریب تیز رفتار بس نے پیچھے سے موٹر سائیکل کو ٹکر ماری جس کے نتیجے میں موٹر سائیکل پر سوار26 سالہ محمد شعیب اور اس کا بھانجا22  سالہ مہتاب موقع پر ہی دم توڑ گئے۔