پشاور اسمبلی میں عمران خان کیخلاف آرٹیکل چھ کے تحت کارروائی کرنے کیلئے قرارداد جمع

پشاور : عمران خان کیخلاف آئین کے آرٹیکل 6 کے تحت مقدمہ چلانے کیلئے قرار داد پشاور اسمبلی سیکرٹریٹ میں جمع کرادی گئی ہے۔قرار داد مسلم لیگ ن کے رکن صوبائی اسمبلی اختیار ولی نے جمع کرائی ہے جس میں کہا گیا ہے کہ عمران خان کی ایما پر 3 اپریل کو ان کے حواریوں نے آئین کی دھجیاں بکھیریں، سپریم کورٹ کےجج بھی عمران خان سے متعلق اضافی نوٹ دے چکے ہیں۔قرار داد میں کہا گیا ہے کہ عمران خان پاک فوج اور دیگر قومی اداروں کو نشانہ بنا رہے ہیں، عمران خان کےخلاف آرٹیکل 6 کی کارروائی کا آغاز فوری کیا جائے۔کوئی بھی شخص جو طاقت کے استعمال یا طاقت سے یا دیگر غیر آئینی ذریعے سے دستور کی تنسیخ کرے تخریب کر ے یا معطل کر ے یا التواء میں رکھے یا اقدام کرے یا تنسیخ کرنے کی سازش کرے یا تخریب کر ے یا معطل یا التواء میں رکھےسنگین غداری کا مجرم ہوگا۔