لاہور(سپورٹس رپورٹر) پاکستان کرکٹ بورڈ مینجمنٹ کمیٹی کے چیئرمین ذکاء اشرف ایشیا کپ کے شیڈول کا اعلان آج کریں گے، ہائبرڈ ماڈل کے تحت ایونٹ پاکستان اور سری لنکا میں منعقد کیا جائیگا۔ پاکستان کرکٹ بورڈ کی مینجمنٹ کمیٹی کے چیئرمین آج مقامی ہوٹل میں ایشیا کپ کی ٹرافی کی رونمائی اور شیڈول کا اعلان کریں گے۔لاہور کے مقامی ہوٹل میں شام سوا سات بجے تقریب کا انعقاد کیا جائیگا۔واضح رہے کہ ایشیا کپ 2023کی میزبانی پی سی بی کو دی گئی تھی مگر بھارتی ٹیم نے شرکت کیلئے پاکستان آنے سے انکار کردیا، جس پر پی سی بی نے درمیانی راستہ نکالتے ہوئے ایونٹ ہائبرڈ ماڈل پر کروانے کی تجویز پیش کی جس کو ایشین کرکٹ کونسل نے منظور کرلیا۔ابتدائی 4 میچز پاکستان جبکہ لیگ کے باقی میچز سری لنکا میں منعقد کیے جائیں گے۔