نواب شاہ (آئی این پی) باراتیوں کی بس حادثے کا شکار ہو گئی جس کے نتیجہ میں   6 افراد جاں بحق جبکہ خواتین اور بچوں سمیت 35 افراد زخمی ہو گئے۔ زخمی باراتی فیض گنج، خیرپور اور نوابشاہ ہسپتال منتقل کر دیئے گئے‘ 17 کی حالت نازک  ہونے کے باعث ہلاکتوں میں اضافہ کا خدشہ ہے۔  حادثہ ٹھری میرواہ میں مہران نیشنل ہائی وے کوٹ لالو کے مقام پر پیش آیا، جہاں باراتیوں کی بس حادثے کا شکار ہوگئی۔ریسکیو حکام کا کہنا ہے کہ زخمی باراتیوں کو فیض گنج خیرپور اور نوابشاہ ہسپتال منتقل کردیا گیا ہے جبکہ 17 افراد کی حالت تشویشناک ہونے سے ان کو گمس ہسپتال منتقل کیا گیا ہے۔ ریسکیو حکام نے بتایا کہ حادثے میں دولہا غلام یاسین سبھایو اور دلہن حمیدا خاتون بھی زخمی ہوگئی ہیں۔ ریسکیو حکام نے مزید بتایا کہ باراتی ٹھل سے  کراچی جارہے تھے اوور ٹیکنگ کی وجہ سے حادثہ پیش آیا۔