لالی وڈ کی نئی رومانوی کامیڈی فلم ’’گول گپو‘‘ سینماؤں کی زینت بن گئی 

کراچی(کلچرل ڈیسک)ٹی وی ، تھیٹر ، لائیو پرفارمنس کے ورسٹائل فنکار سخاوت ناز ایک نئے انداز میں شائقین کو تفریح فراہم کرنے کیلئے بطور ہیرو رومانوی کامیڈی فلم  " گول گپو "  میں جلوہ گر ہوگئے۔مذکورہ فلم ملک بھر کے سینماؤں میں ڈسٹری بیوشن کلب کے پلیٹ فارم سے نمائش کیلئے پیش کردی گئ۔ طنز و مزاح سے بھرپور اس فلم کی کہانی ایک دلچسپ پلاٹ کا احاطہ کرتی ہے جسے فنکاروں کی جاندار اداکاری اور قہقہوں سے بھرپور مکالموں نے چار چاند لگا دئیے ہیں۔۔ ڈائریکٹر زبیر شوکت کی ڈائریکشن میں بنی فلم کی سٹارکاسٹ میں سخاوت ناز کے علاوہ زارا نور، روحی خان، اشرف خان، احمد عبدالرحمان، زونیرہ ماہم، رضیہ ملک،عالیہ بخاری اور لبنیٰ بٹ شامل ہیں جنہوں نے اپنے کرداروں سے انصاف کرکے  "گول گپو " کو مکمل فیملی تفریحی فلم بنا دیا ہے۔ ’’گول گپو‘‘ کے پروموز کو ملکی و غیر ملکی فنکاروں نے بھرپور داد و تحسین سے نوازا ہے اور  سخاوت ناز اور انکی ٹیم کی کامیابی کیلئے نیک خواہشات سے مزین اپنے خصوصی پیغامات بھی بھجوائے ہیں۔ ڈسٹری بیوشن کلب کے ایگزیکٹو ڈائریکٹر شیخ عابد رشید نے بتایا کہ ’’گول گپو‘‘ مکمل فیملی تفریحی فلم ہے جسے بنانے میں پروڈکشن ٹیم کی ان تھک محنت اور خلوص شامل ہے اور یہ بالخصوص پنجابی فلموں کے شائقین کی توجہ کا مرکز بنے گی۔