پیش نظر کتاب ’رمضان المبارک فضائل ، فوائد وثمرات ، احکام ومسائل اور کرنے والے کام‘ سے واضح ہے کہ اپنے موضوع پر یہ نہایت ہی مفید، جامع اور رہنما کتاب ہے۔ یہ کتاب دینی کتابوں کے مستند عالمی ادارہ دارالسلام انٹر نیشنل کی شائع کردہ ہے۔ کتاب کے مصنف معروف عالم دین، مفسر قرآن فضیلة الشیخ حافظ صلاح الدین یوسف مرحوم ہیں۔مرحوم جس موضوع پر بھی قلم اٹھاتے لکھنے کاحق ادا کردیتے تھے۔ انھیں اللہ تعالی نے دین و شریعت کے علم کا پختہ رسوخ عطا فرمایا تھا۔ ایک مصنف کی حیثیت سے ان کے قلم میں ایک خوبی یہ بھی ہے کہ وہ ہر موضوع کو جہاں کتاب و سنت کے استد لال سے مزین کرتے ہیں، وہاں اس کی پیشکش میں ایک ایسا اسلوب اختیار کرتے ہیں جس میں سلامت، روانی، شگفتگی، وضاحت اور تحریر و انشاکے تمام اوصاف موجود ہوتے ہیں۔حافظ صلاح الدین یوسف کی پیش نظر کتاب تین ابواب پر مشتمل ہے۔کتاب میں بتایا گیا کہ ہم رمضان المبارک کااستقبال کیسے کریں، رمضان المبارک کے خصوصی اعمال وظائف، صحیح احادیث کی روشنی میں روزوں کی فضیلت وفرضیت، روزے کے فوائد وثمرات، روزے کے احکام ومسائل،روزے کی تعریف، روزے کے ضروری احکام، کن کن چیزوں سے روزہ ٹوٹ جاتا ہے، قضائے روزہ، اعتکاف، تروایح، صدقة الفطر کے مسائل جیسے اہم موضوعات کتاب میں بیان کیے گئے ہیں۔ بات یہ ہے کہ قرآن مجید میں روزے کی فرضیت اور اس کے مختصر احکام بیا ن کیے گئے ہیں مگر روزوں کا مکمل نقشہ احادیث کی کتابوں میں پوری تفصیل اور تشریح کے ساتھ موجود ہے جبکہ روزوں سے متعلق تقریباً تمام صحیح احادیث اس کتاب میں جمع کردی گئی ہیں۔ جہاں تک رمضان المبارک کی عبادات اور فضائل و برکات کا تعلق ہے اس پر درجنوں صحیح احادیث پیش کی جاتی ہیں مگر رسول کا یہ فرمان کہ جس شخص نے رمضان کے روزے ایمان اور احتساب کے ساتھ رکھے اس کے سابقہ گناہ معاف ہوجاتے ہیں، یہ ایک عظیم خوشخبری اور بشارت ہے جس سے محرومی کا کوئی تصور بھی نہیں کرسکتا۔ لیکن یہاں ایک بات پر خصوصی توجہ رہنی چاہیے کہ اتنے بڑے انعام کا استحقاق صرف اسی وقت حاصل ہوتا ہے جب رمضان المبارک کے روزے مسنون طریقہ پر رکھے جائیں اور ایمان و احتساب کی شرائط کو پورا کیا جائے۔ یہ سب کچھ کیسے ممکن ہے، اس مقصد کے لیے دارالسلام کی یہ کتاب اہل ایمان کے لیے لاجواب اور نہایت ہی عمدہ پیشکش ہے۔ دارالسلام انٹر نیشنل کے مینیجنگ ڈائریکٹر عبدالمالک مجاہد کہتے ہیں، مجھے یقین ہے کہ اس مختصر کتاب کے مطالعے سے ہر مسلمان رمضان المبارک کا شایان شان استقبال کر سکتا ہے، اس مقدس مہینے کے تمام شرعی اور مسنون احکام کو جان سکتا ہے۔ اس کتاب میں جہاں روزے کے احکام و مسائل کو واضح کیاگیا ہے وہاں قیام اللیل ( تراویح )، لیلة القدر، اعتکاف اور صدقة الفطر کے حوالے سے بھی کافی اور شافی مواد پیش کیا گیا ہے۔ یہ کتاب درحقیقت اہل ایمان کے لیے دارالسلام کی طرف سے رمضان المبارک کے مہینہ میں خصوصی سوغات اور تحفہ خاص ہے۔ یہ کتاب دیکھنے میں اگر چہ مختصر ہے لیکن اختصار کے باوجود اس میں اتنی جامعیت ہے کہ ا س میں تمام ضروری اور اہم مسائل بیان کردیے گئے ہیں۔ کتاب میں احادیث ِ صحیحہ کی روشنی میں روزوں کی فضیلت کی تفصیل موجود ہے۔ اسی طرح کتاب میں رمضان المبارک سے متعلق بعض مشہور مگر ضعیف احادیث کی وضاحت بھی موجود ہے۔ روزے کے فوائد و ثمرات کا تذکرہ ہے، یعنی تقویٰ کیا ہے جو روزوں سے انسان کے اندر پیدا ہوتا ہے؟ روزوں سے تقویٰ کس طرح پیدا ہوتا ہے؟ اور تقویٰ سے کیا فوائد و ثمرات حاصل ہوتے ہیں؟ قیام اللیل یعنی نماز تراویح کے مسائل اور اس کی تعداد کی تحقیق بھی کتاب میں شامل ہے جو قابل مطالعہ ہے۔ اعتکاف کے مسائل اور لیلة القدر کے فضائل کی وضاحت بھی کتاب میں شامل ہے۔ اس اعتبار سے یہ کتاب بلا شبہ ’بقامت کہتربہ قیمت‘ کے مصداق اور اس لائق ہے کہ ہر مسلمان اس کا مطالعہ کرے اور رمضان المبارک کے فیوض و برکات سے اپنا دامن بھرنے اور رحمت و مغفرت الٰہی کا مستحق بننے کی کوشش کرے۔ 188صفحات کی اس کتاب کی قیمت 190روپے اور ملنے کا پتا دارالسلام انٹر نیشنل ، نزد سیکرٹریٹ سٹاپ ، لاہور ہے۔ کتاب خریدنے کے لیے فون نمبر 04237324034 پر بھی رابطہ کیا جاسکتا ہے۔