کراچی (اسپورٹس رپورٹر)ملیر ینگ بوائز فٹبال کلب کے زیر اہتمام سراقبال فائونڈیشن کے تعاون سے جاری آل کراچی ماما کریم بخش قمبرانی یادگاری فٹبال ٹورنامنٹ کے افتتاحی میچ میں شفیع میموریل نے کلمت اسٹار کاٹھور کو 1-4گول سے شکست دی۔ کھیل کے دسویں منٹ میں شفیع میموریل کے ساجد خان نے پہلا گول کرکے اپنی ٹیم کو برتری دلادی ۔ کھیل کے 22ویں منٹ میں شفیع میموریل کے ساجد خان نے دوسرا گول کرکے اپنی ٹیم کو صفر کے مقابلے میں دو گول سے برتری دلادی۔ وقفہ کے بعد دونوں ٹیموں نے جارحانہ کھیل پیش کیا جس کی بدولت کلمت اسٹار کے فارورڈ رمیز نے گول کرکے مقابلہ 2-1کردیا اور اپنی ٹیم کو کھیل میں واپس لے آئے لیکن شفیع میموریل نے اپنے بہترین کھیل کی حکمت عملی برقرار رکھی اور ان کے اسٹار فارورڈ ساجد خان نے تیسرا گول کرکے اپنی ٹیم کو 1-3گول کی برتری دلاتے ہوئے اپنی ہیٹ ٹرک مکمل کی۔ شفیع میموریل کے فارورڈ عبداللہ نے اپنی ٹیم کا چوتھا گول اسکور کیا ، اس طرح یہ شاندار افتتاحی میچ شفیع میموریل نے 4-1سے کلمت اسٹار کو شکست دے کر جیت لیا۔ میچ میں ریفری کے فرائض عطاء اللہ بلوچ، زاہد، شہباز نے انجام دیئے، میچ کمشنر جہانزیب بلوچ جبکہ میڈیا کوآرڈینیٹر اسلم کامریڈ اور حارث بلوچ تھے۔ٹورنامنٹ کے سلسلے میں ہفتہ 19مئی کو صاحبداد محمڈن اور شہید خالد لاشاری کی ٹیموں کے مابین میچ کھیلا جائے گا۔