کراچی (آئی این پی) شہر قائد میں موسلا دھار بارش اور تیز آندھی کی وجہ 4 افراد جاں ہو گئے جبکہ متعدد افراد زخمی ہو گئے، بارش اور تیز ہوائوں سے گرمی کی شدت میں کمی جبکہ بارش کے باعث شہریوں کو مشکلات کا سامنا ہے۔ تفصیلات کے مطابق شیرشاہ کے علاقے میں دیوار گرنے سے ایک بچہ جاں بحق ہو گیا، بلدیہ ٹائون میں بارش کے باعث چھت گرنے سے خاتون سمیت 2 افراد جاں بحق ہوگئے، سعید آباد میں گھر کی چھت گرنے سے ایک بچہ جاں بحق ہوگیا اورنگی ٹائون میں آندھی کے باعث بجلی کاپول گر گیا۔ آئی آئی چندریگر روڈ اور کیماڑی سمیت کئی مقامات پر تیز بارش ہو رہی ہے، سرجانی، نیو اور نارتھ کراچی میں تیز آندھی کی وجہ سے ٹریفک کی روانی متاثر ہے۔ لسبیلہ، حب، گڈانی اور گردو نواح میں بھی رم جھم کی اطلاعات ہیں۔ بارش ہوتے ہی مختلف علاقوں میں بجلی غائب ہو گئی۔ پی آئی بی، سہراب گوٹھ، صفورا، گلشن اقبال، گلستان جوہر، پی ای سی ایچ، صدر، آئی آئی چندریگر روڈ، شاہ فیصل، نیو کراچی، سرجانی، ایف بی ایریا، ناظم آباد، اورنگی ٹاون میں بھی بجلی معطل ہے۔ کے الیکٹرک کی جانب سے عوام سے اپیل کی گئی ہے کہ وہ شدید موسمی اثرات میں احتیاط برتیں۔ عوام بجلی کے تار، پی ایم ٹی اور انفراسٹرکچر سے دور رہیں۔ کچھ علاقوں میں بجلی کی فراہمی متاثر ہے۔ بجلی کے تاروں پر درخت گرنے سے پاور انفراسٹرکچر متاثر اور تار ٹوٹ سکتے ہیں۔ کنڈے والے علاقوں میں احتیاطی طور پر کچھ مقامات پر عارضی بجلی بند کی جا سکتی ہے۔