پولیس لائنز قلعہ گجر سنگھ میں ’’سٹریس مینجمنٹ‘‘ورکشاپ

لاہور(نامہ نگار) پولیس لائنز قلعہ گجر سنگھ میں گزشتہ روز ’’سٹریس مینجمنٹ‘‘ورکشاپ کا انعقادکیا گیا۔ایس پی ہیڈ کوارٹرز محمد اویس ملک کی زیر نگرانی تربیتی ورکشاپ میں آپریشنز ونگ کے 30 سب انسپکٹرز اوراسسٹنٹ سب انسپکٹرز نے شرکت کی۔ موٹیویشنل سپیکر اویس بن مہتاب اور ایس پی ہیڈ کوارٹرز محمد اویس ملک نے سٹریس مینجمنٹ بارے لیکچرز دیئے۔ انچارج سکول انسپکٹر غزالہ شریف اور لا ء انسٹرکٹر روزینہ بخاری بھی اس موقع پر موجود تھیں۔ تربیتی ورکشاپ کے دوران ذ ہنی دباؤ کی مختلف وجوہات سے آگاہی دی گئی اور اس سے بچاؤ کیلئے مختلف مشقیں کروائی گئیں۔ ایس پی ہیڈ کوارٹرز محمد اویس ملک کا کہنا تھا کہ پولیس افسران و اہلکاروں کیلئے کسی بھی طرح کے حالات میں سٹریس مینجمنٹ سے آگاہی نہایت اہم ہے۔ ورکشاپ کا مقصد پولیس افسران کو ذہنی دباؤ سے بچاؤ اور کنٹرول کرنے کے حوالے سے تربیت دینا ہے۔