گکھڑ منڈی(نا مہ نگار) چھوٹا بھائی ہارٹ اٹیک سے، بڑا ٹرین کی زدمیں آکرجاں بحق ہوگیا، یکے بعد دیگرے دونوں بھائیوں کے جنازے اٹھنے پر گھر میں کہرام مچ گیا۔ گکھڑ کے محلہ حاجی حسن پورہ ریلوے پھاٹک نت کلاںکے رہائشی محمد بوٹا گجر کا چھوٹا بیٹا 28 سالہ شہزاد گجر گذشتہ روز ہارٹ اٹیک کے باعث ڈاکٹر کے پاس زیر علاج تھا جہاں وہ دم توڑ گیا۔ اتفاقاً اسکا بڑا بھائی 30 سالہ امداد حسین گجر بھی گذشتہ روز ریلو ے پھا ٹک اوجلہ نہر کے قریب عوامی ایکسپریس کی زد میں آکر جاں بحق ہوگیا جس کی شناخت نہ ہو نے پر ریلو ے پھاٹک کے گیٹ مین نے متوفی امداد حسین کی نعش شناخت کیلئے پھاٹک پر رکھ دی جبکہ اہلخانہ نے چو کی گکھڑ سٹی میں گمشدگی کی رپٹ درج کروائی تو 15 پر انہیں متوفی امداد حسین کی ٹرین تلے آ کر ہلاکت کی اطلاع ملی تو ورثا نے ضروری کارروائی کے بعد نعش وصول کی۔ ہلاک شدگان دونوں بھائیوں میں ایک روز قبل شہزاد گجر کی تدفین کی گئی جبکہ دوسرے بھائی امداد گجر کو گذشتہ شب سپردخاک کردیا گیا۔ یکے بعد دیگرے دونوں بھائیوںکے جنازے اٹھنے سے گھر میں کہرام مچ گیا، ہر آنکھ اشکبار تھی، متوفی دو ہی بھائی تھے۔