لاہور(سپورٹس رپورٹر) لاہور کرکٹ کلب فار بلائنڈ کے زیر اہتمام بلائنڈ کرکٹ ٹورنامنٹ کے افتتاحی میچ میں اوکاڑہ نے فیصل آباد کو 50 رنز سے شکست دے دی۔ ویمن ٹیم کی سابق کپتان ثنا میر، سماجی میاں سعید ڈیرے والے اور مسز جسٹس ملک قیوم نے ٹورنامنٹ کا افتتاح کیا ۔ علیم ڈار اکیڈمی جوہر ٹاون میں افتتاحی میچ میں اوکاڑہ نے چھ وکٹوں کے نقصان پر 192 رنز بنائے۔ جس میں افتخار حسین نے 71 اور فصیح اللہ 30 رنزبناکر نمایاں رہے۔ جواب میں فیصل آباد کرکٹ کلب فار بلائنڈ کی ٹیم 8 وکٹوں کے نقصان پر 140 رنز بناسکی۔ اس موقع پر میاں سعید ڈیرے والے اور ویمن ٹیم کی سابق کپتان ثنا میر کا کہنا تھا کہ بلائنڈ کرکٹرز نے ملک کانام روشن کیا ہے ان کے حوصلے قابل ستائش ہیں ۔ قومی بلائند ٹیم کے دو سابق کپتانوں عبدالرزاق اورعامر اشفاق کا کہنا تھا کہ وہ بلائنڈ کرکٹ کے فروغ کے لئے ہر ممکن قدم اٹھائیں گے ۔ ٹورنامنٹ میں چار ٹیمیوں کے درمیان لیگ کی بنیاد پر میچز کھیلے جائیں گے۔