ملتان میں سپورٹس بورڈ پنجاب کرکٹ اکیڈمی کا افتتاح 

ملتان( سماجی رپورٹر)سپورٹس بورڈ پنجاب کے زیر اہتمام وزیر کھیل پنجاب کی زیر سرپرستی اور ڈی جی سپورٹس پنجاب کی ہدایت پر پنجاب بھر میں سپورٹس بورڈ پنجاب کرکٹ اکیڈمی کے ملتان میں قیام کے سلسلہ میں ایک تقریب ڈسڑکٹ سپورٹس گراونڈ ملتان میں منعقد ہوئی۔جس میں ملتان میں اکیڈمی کے قیام کا افتتاح انٹرنیشنل کرکٹر صہیب مقصود نے کیا۔اس موقع پرکرکٹر عذیر ممتاز، محمد جمیل کامران،مخدوم مظفر عالم،ناصر حسین،طایر محمود،رومانہ بخاری،نوید باقر،فاروق لطیف نے شرکت کی۔رانا ندیم انجم نے کہا کہ ان اکیڈیمز میں بوائز کے ساتھ ساتھ گرلز کھلاڑیوں کو بھی تربیت کے مواقع فراہم کیے جائیں گے۔انٹرنیشنل کرکٹر صہیب مقصود نے کہا کہ گراس روٹ لیول پر اس طرح کی تربیت کے مواقع ملنا انتہائی قابل تحسین ہے۔اس موقع پر بوائز اور گرلز کھلاڑیوں میں شرٹس بھی تقسیم کی گئیں۔