لاہور(سپورٹس رپورٹر ) دورہ آسٹریلیا سے قبل پاکستان کے تربیتی کیمپ کیلئے کھلاڑیوںکے نام شارٹ لسٹ کر لئے گئے ہیں ۔ کیمپ 22 سے 29نومبر تک راولپنڈی میں ہوگا اور ٹیم 30نومبر کو اسلام آباد سے آسٹریلیا کیلئے روانہ ہوگی۔ نئے مقرر کردہ ٹیسٹ کپتان شان مسعود نے ٹیم ڈائریکٹر محمد حفیظ اور چیف سلیکٹر وہاب ریاض کے ساتھ تربیتی کیمپ کیلئے ممکنہ کھلاڑیوں کی نشاندہی کی ہے۔قائد اعظم ٹرافی کے ٹاپ پرفارمرز صاحبزادہ فرحان، صائم ایوب اور نمایاں وکٹ لینے والے خرم شہزاد منتخب ہونے والوں میں شامل ہیں۔ پاکستانی ٹیم کے کوچنگ سٹاف کو بھی حتمی شکل دےدی گئی ہے۔ محمد حفیظ ہیڈ کوچ اور بیٹنگ کوچ کا دوہرا کردار ادا کریں گے۔ عمر گل باﺅلنگ کوچ جبکہ فیلڈنگ کوچ عبدالمجید برقرار رہیں گے۔ نوید اکرم چیمہ ٹیم منییجر کی ذمہ داری سنبھالیں گے اور شاہد اسلم اسسٹنٹ کوچ اور منیجر کے فرائض انجام دیں گے۔ رضا راشد کو دورہ آسٹریلیا کیلئے میڈیا منیجر مقرر کیا گیا ہے۔ سکواڈ اور کوچنگ سٹاف کا باضابطہ اعلان پی سی بی مینجمنٹ کمیٹی کے سربراہ ذکا اشرف کی منظوری سے مشروط ہے جو اس وقت بھارت میں ہیں۔ دورہ آسٹریلیا کیلئے سکواڈ میں 17سے 18کھلاڑیوں کو شامل کرنے کا فیصلہ کیا گیا ہے۔ذرائع کے مطابق کیمپ لاہور میں لگنا تھا مگر سموگ کی وجہ سے راولپنڈی منتقل کیا گیا، کیمپ میں پاکستان کپ اور قائد اعظم ٹرافی میں بہتر کارکردگی کا مظاہرہ کرنے والے کھلاڑیوں کو بھی بلایا گیا ہے۔ پاکستان اور آسٹریلیا کے درمیان 3 ٹیسٹ میچز کی سیریز کا آغاز 14 دسمبر سے ہوگا۔ آسٹریلوی کنڈیشنز سے ہم آہنگی کیلئے کرکٹرز کو زیادہ ٹریننگ کا موقع دیا جائےگا، سفری پلان بھی بدل دیا گیا ہے، اب 29 اور 30 نومبر کی درمیانی شب ٹیم اسلام آباد سے روانہ ہوگی۔