بالی وڈ کے نامور ریپر بادشاہ نے پاکستانی اداکارہ ہانیہ عامر کو اپنے کانسرٹ میں دیکھ کر دلچسپ خیالات کا اظہار کیا۔ہانیہ عامر ان دنوں کینیڈا کے دورے پر ہیں، جہاں وہ اپنے مداحوں سے مختلف تقریبات میں ملاقات کررہی ہیں اور ساتھ ہی حاضرین کے سوالوں کے جواب بھی دیتی ہیں۔حال ہی میں ہانیہ عامر کو کینیڈا میں ہونے والے بالی وڈ گلوکار بادشاہ کے کانسرٹ میں دیکھا گیا جس کی ویڈیو  سوشل میڈیا پلیٹ فارمز پر زیرِ گردش ہے۔ویڈیو میں دیکھا جاسکتا ہے کہ گلوکار اپنا گانا گا رہے تھے کہ پھر انہوں نے کراؤڈ میں ہانیہ عامر کو دیکھا جس کے بعد مداحوں کی جانب سے ہانیہ ہانیہ کی آوازیں بلند ہوگئیں۔بادشاہ نے اپنے گانے کو روک کر حاضرین سے مخاطب ہوکر کہا کہ 'یہ میرا شو ہے اگر ہانیہ اسٹیج پر آگئی تو یہ اس کا شو ہو جائے گا'، اس کے بعد گلوکار نے اپنا گانا دوبارہ شروع کردیا۔واضح رہے کہ ہانیہ عامر اور بالی وڈ گلوکار  بادشاہ کی دوستی کے چرچے دونوں ممالک میں گزشتہ دنوں ہوتے رہے اور یہ دونوں سپر اسٹارز پہلے بھی کئی بار مختلف ممالک میں مل چکے ہیں جس کی ویڈیو سوشل میڈیا پر سامنے آئیں۔