خدمت کا جذبہ لیکر واپس آ رہا ہوں، عالم اسلام اسرائیل کو قتل عام سے روکے: نوازشریف

لاہور (نوائے وقت رپورٹ) انٹرنیشنل ختم نبوت موومنٹ ورلڈ کے مرکزی امیر مولانا ڈاکٹر سعید احمد عنایت اللہ نے اپنے بیٹوں حماد سعید اور حمزہ سعید کے ہمراہ محمد نواز شریف سے ان کی خواہش پر ”جدہ“ میں ان کی رہائش گاہ پر 2 گھنٹے سے زائد تفصیلی ملاقات کی۔ غزہ فلسطین، مشرق وسطیٰ کے حالات، اسرائیلی مظالم، امت مسلمہ اور عالمی حالات، پاکستان کی اقتصادی و معاشی صورت حال، مہنگائی، اسلام کے اقتصادی و معاشی حل، حضور کی سیرت طیبہ، عقیدہ ختم نبوت کی اہمیت و ضرورت پر تفصیلی بات چیت ہوئی۔ میاں محمد نواز شریف نے کہا کہ غزہ میں فلسطینی مسلمانوں پر مظالم اور ہسپتال پر اسرائیل کے حملہ کے نتیجہ میں سینکڑوں بچوں، عورتوں، مریضوں اور نہتے بے گناہ فلسطینی مسلمانوں کی مظلومانہ شہادت پر دل خون کے آنسو رو رہا ہے۔ انہوں نے کہا کہ عالم اسلام کو متحد ہوکر اسرائیل کو اس سفاکیت و درندگی اور نہتے فلسطینی مسلمانوں کے قتل عام سے روکنا ہوگا۔ انہوں نے کہا کہ میں پاکستان میں اسلام اور ملک و قوم کی خدمت کی نیت اور جذبہ سے جا رہا ہوں۔ مولانا ڈاکٹر سعید احمد عنایت اللہ نے نواز شریف سے گفتگو کرتے ہوئے کہا کہ وہ پاکستان کو مہنگائی اور اقتصادی و معاشی مشکلات سے نکالنے اور ملک و قوم کی خدمت کی نیت اور عزم لیکر وطن واپس جائیں، اس وقت پاکستان اور عالم اسلام کو میاں محمد نواز شریف جیسی اسلام پسند، مخلص اور محب وطن قیادت کی ضرورت ہے۔ انہوں نے نواز شریف کو عقیدہ ختم نبوت کے عنوان پر اپنی تحریر کردہ کتب بطور ہدیہ پیش کیں جس پر میاں محمد نواز شریف نے ڈاکٹر سعید احمد عنایت اللہ کی طرف سے قرآن مجید کی تفسیر، ترجمہ قرآن مجید اور عقیدہ ختم نبوت سمیت دیگر عنوان پر تحقیقی و تصنیفی خدمات پر ان کو خراج تحسین پیش کرتے ہوئے مبارکباد دی۔