لاہور(نامہ نگار)انسپکٹر جنرل پولیس پنجاب ڈاکٹر عثمان انور نے شہریوں کی خدمت و حفاظت میں شاندار کارکردگی پر سرگودھا پولیس کی ایس ایچ او انعم سرفراز اور انکی ٹیم کو سی سی ون لیٹرز اور انعامات سے حوصلہ افزائی کی ہے۔ چند روز قبل سرگودھا میں نہر لوئر جہلم سے ملحقہ پائپ لائن پھٹنے سے حمید ٹاؤن کے گھروں میں نہر و سیوریج کا پانی داخل ہوگیا، ایس ایچ او انعم سرفراز اور انکی ٹیم نے جانوں کی پرواہ کئے بغیر چار فٹ پانی میں پھنسی فیملیز کو ریسکیو کیا۔پولیس اہلکاروں نے خواتین اور بچوں سمیت 37 افراد کو پانی سے نکال کر محفوظ مقامات پر منتقل کیا،آئی جی پنجاب ڈاکٹر عثمان انور نے کہاکہ سرگودھا پولیس کی ٹیم نے اپنی ڈیوٹی سے بڑھ کر فرائض کی ادائیگی یقینی بنا کر مثالی کارکردگی کا مظاہرہ کیا، خدمت خلق کے جذبے سے سرشار فرض شناس اور باہمت افسران و اہلکار پنجاب پولیس کا اصل سرمایہ ہیں۔شاندار کارکردگی کے حامل افسران و اہلکاروں کی حوصلہ افزائی کا سلسلہ ہر سطح پر جاری رہے گا۔