شوال (صباح نیوز + این این آئی) جنوبی وزیرستان میں امریکی ڈرون حملے میں 7 افراد جاں بحق، 2 زخمی ہوگئے۔ سکیورٹی فورسز کی جیٹ طیاروں کے ذریعے بمباری سے 13 دہشت گرد مارے گئے جبکہ 22 ٹھکانے تباہ ہوگئے۔ تفصیلات کے مطابق جنوبی وزیرستان کی تحصیل سروگئی کے علاقے زیارت زئے میں ڈرون حملہ کیا گیا جس کے نتیجے میں 7 افراد جاں بحق اور 2 زخمی ہوگئے۔مقامی ذرائع کے مطابق امریکی جاسوس طیارے نے ایک مکان اور گاڑی کو نشانہ بناتے ہوئے 2 میزائل داغے جس کے نتیجے میں گھر مکمل طور پر تباہ ہوگیا۔ڈرون حملے کے بعد علاقے میں شدید خوف وہراس پایاگیا جبکہ جاسوس طیارے نے حملے کے بعد علاقے میں نچلی پروازیں بھی کیں جس سے مقامی آبادی میں شدید خوف و ہراس پھیل گیا۔ دوسری جانب جنوبی وزیرستان کی تحصیل شوال میں جیٹ طیاروں کی بمباری سے تیرہ دہشتگرد مارے گئے۔ اطلاعات کے مطابق سکیورٹی فورسز نے جنوبی وزیرستان کی تحصیل شوال میں دہشت گردوں کے خلاف کارروائی کرتے ہوئے تیرہ دہشت گردوں کو ہلاک کردیا۔ سکیورٹی فورسز نے جیٹ طیاروں سے بمباری کر کے دہشت گردوں کے بائیس ٹھکانے کو تباہ کردیا۔
جنوبی وزیرستان