خود انحصاری کی طرف سفر کیلئے پالیسیاں ترتیب دی جائیں:اشرف بھٹی 

لاہور( کامرس رپورٹر)آل پاکستان انجمن تاجران کے صدر اشرف بھٹی نے کہا ہے کہ حکومت روایتی طریقوں سے ہٹ کر قومی آمدن کے نئے ذرائع تلاش کرنے اورمعیشت کو پائوں پر کھڑا کرنے کیلئے اپنی پالیسیوں کو از سر نو ترتیب دے۔ اب وقت آ گیا ہے کہ ہم بطور قوم عملی طور پر خود انحصاری کی طرف سفر کا آغاز کریں۔ تمام پہلوئوں پر غور کیا جائے اور اس کیلئے مشاورت کاعمل شروع کر کے از سر نو پالیسیاں ترتیب دی جائیں۔ ٹیکسز وصولی کے اہداف کے حصول کیلئے چور راستوں کی بندش ، شرح میں کمی اور پیچیدگیوں کو ختم کر کے نظام کو سہل بنانا نا گزیر ہے۔ وفاقی اور صوبائی مختلف محکموں کے ذریعے ٹیکسز کی وصولی بھی مسائل کی بنیادی وجہ ہے جس سے اربوں روپے قومی خزانے میں جانے کی بجائے مختلف لوگوں کی جیبوںمیں چلے جاتے ہیں۔ ہمیں عالمی مالیاتی اداروں کی ڈکٹیشن کی بجائے اپنے ماحول کو دیکھتے ہوئے پالیسیاں بنانا ہوں گی۔ ٹیکسیشن پالیسی میں تبدیلی لانا وقت کی اہم ضرورت ہے جس کیلئے حکومت اور اس کے متعلقہ اداروں کو ہنگامی بنیادوں پر پیشرفت دکھانا ہو گی۔ عام عوام سمیت تمام شعبوںکے ٹیکس دہندگان کو ٹیکسیشن پالیسی کی مشاورت میں شامل کیا جائے اور ان کی تجاویز کو نظر انداز کرنے کی بجائے زیر غور لایا جائے ۔ پہلے سے ٹیکس کی ادائیگی کرنے والوں کو گھیرے میں لینے کی بجائے ٹیکسز کی شرح میں کمی اور وصولی کیلئے پیچیدگیوں کو ختم کر کے اسے سہل بنانے سے ٹیکس کا دائرہ کا ربڑھایا جا سکتا ہے۔