امریکی F-35 لڑاکا طیارے کا ملبہ مل گیا ہے جب کہ پائلٹ طیارے سے نکلنے میں کامیاب رہا۔

امریکی فوج نے لاکھوں ڈالر مالیت کا سٹیلتھ جنگی طیارہ غائب ہونے کے بعد اس کی تلاش کے لیے عوام سے مدد مانگی تھی۔

رپورٹ کے مطابق حکام نے اتوار کو پیش آنے والے واقعے کو حادثہ قرار دیتے ہوئے کہا کہ ایف 35 جنگی طیارہ ریاست جنوبی کیرولینا میں پرواز کر رہا تھا۔

پائلٹ نے حاضر دماغی کا مظاہرہ کرتے ہوئے ایمرجنسی کی صورتحال میں فوری طور پر خود کو ایجکٹ کرکے جہاز سے علیحدہ کرلیا۔ پائلٹ کی تو جان بچ گئی لیکن یہ مہنگا طیارہ لاپتہ ہو گیا تھا۔میرین کور کے جوائنٹ بیس چارلسٹن کے مطابق اتوار کی سہ پہر کو لاپتہ ہونے والے F-35B لائٹننگ II جیٹ کا ملبہ جنوبی کیرولائنا کی دیہی ولیمزبرگ کاؤنٹی میں پایا گیا۔

ملبہ میرین بیس سے تقریباً دو گھنٹے شمال مشرق میں موجود تھا اور مقامی باشندوں سے کہا جا رہا تھا کہ وہ اس جگہ سے دور رہیں۔

بیس نے کہا کہ کمیونٹی کے اراکین کو اس علاقے سے گریز کرنا چاہیے کیونکہ بحالی ٹیم ملبے کے میدان کو محفوظ بنا رہی ہے۔