لاہور(نامہ نگار) مصطفی ٹائون کے علاقے میں اورنج لائن میٹرو ٹرین منصوبے کی کرین کی زد میں آکر 12 سالہ لڑکا جاں بحق ہوگیا جبکہ واقعہ نے لوگوں نے شدید احتجاج کیا۔ سبزہ زار کا 12 سالہ عمر گل منصورہ کے قریب اورنج لائن ٹرین منصوبے پر کام کرنے والی کرین سے ٹکرا کر جاں بحق ہو گیا‘ عمر گل منصورہ کے قریب جار ہا تھا کہ سڑک کی کھدائی پر مامور کرین کی زد میں آگیا۔ عینی شاہدین کا کہنا ہے کہ عمر گل اپنی لین میں تھا مگر کرین نے اسے ٹکر مار دی جس کے باعث وہ گڑھے میں جا گرا اور دم توڑ گیا، واقعہ کے بعد کرین ڈرائیور موقع سے فرار ہوگیا۔ واقعہ پر لوگوں نے شدید احتجاج کیا اور نعرے بازی کی۔ پولیس نے مقتول کی نعش قبضے میں لے کر کارروائی شروع کر دی ہے۔