خیبر پختونخوا،بلوچستان اور پنجاب سمیت ملک کے مختلف شہروں کے علاوہ کشمیر اورگلگت بلتستان میں بارش کے بعد موسم خوشگوار ہوگیا جبکہ کوئٹہ شہر کے گرد و نواح میں پہاڑوں پر برفباری کے بعد موسم سرد ہوگیا۔اسلام آباد، لاہور، ملتان اور ساہیوال سمیت پنجاب کے مختلف حصوں اور بالائی خیبر پختونخوا میں بارش ہوئی جبکہ چمن اور زیارت سمیت شمالی بلوچستان میں بارش کا سلسلہ وقفے وقفے سے جاری ہے۔کوئٹہ شہر کے گرد و نواح میں پہاڑوں پر گزشتہ رات برفباری ہوئی جبکہ وادی ہنہ اور اوڑک کے پہاڑی سلسلے میں بھی برف پڑی، پہاڑوں پر برفباری اور بارش کے بعد شہر کا موسم سرد ہوگیا اور آئندہ 24گھنٹے تک سردی کی لہر برقرار رہنے کا امکان ہے۔محکمہ موسمیات کے مطابق خیبرپختونخوا، کشمیر، گلگت بلتستان کے پہاڑی علاقوں میں لینڈ سلائیڈنگ کا خدشہ اور ژالہ باری کا بھی امکان ہے۔