مکرمی! یوٹیلیٹی سٹورز پر دیگر مشکلات کے ساتھ ساتھ ایک بہت بڑی اذیت سے خاص طور پر خواتین کو دو چار ہونا پڑتا ہے وہ اس کے عملہ کی بدکلامی اور نامناسب رویہ ہے۔ اس سلسلے میں سلطان احمد روڈ پر اچھرہ میں واقع یوٹیلیٹی سٹور میں ایسی بدتمیزی کا کئی بار سامنا کرنا پڑا۔ اس کے علاوہ اکثر اوقات اشیاء کے حساب کتاب میں بھی گڑ بڑ نوٹ کی گئی ہے۔ ایک طرف تو مخصوص جاننے والے دکانداروں کو وافر چینی دینے کی شکایات ہیں دوسری جانب ایک دو کلو چینی لینے والے غریبوں کو ایک ہزار روپے کی خریداری کرنے پر مجبور کیا جاتا ہے اور اس موقع پر بحث و تکرار کا سلسلہ عملہ کی بدکلامی پر ختم ہوتا ہے۔ اس سلسلے میں خواتین اور معمر افراد کو خاص طور پر نشانہ بنایا جاتا ہے۔ براہ کرم اس صورتحال کا نوٹس لیا جائے۔ متعلقہ عملہ کی جگہ ایسا عملہ تعینات کیا جائے جو بدکلامی نہ کرے۔(عمرانہ خانہ، گلشن رحمن، رحمن پورہ، لاہور)