اسلام آباد (این این آئی)پی ٹی آئی حکومت کی دو سالہ کارکردگی ، اہم کارناموں اور اقدامات پر بحث کیلئے سینٹ میں تحریک جمع کر ادی گئی ۔ بدھ کو پی ٹی آئی حکومت کی کارکردگی پر بحث کی تحریک سینیٹر فیصل جاوید خان اور سینیٹر ذیشان خانزادہ خان نے جمع کرائی ۔ سینیٹر فیصل جاوید نے کہاکہ حکومت نے مشکل حالات میں ملکی معاملات پر جس طرح قابو پایا اس کی تفصیل عوام کے سامنے آنی چاہئے، نامساعد حالات کے باوجود حکومت نے گزشتہ دو سالوں میں شاندار کارکردگی کا مظاہرہ کیا۔ انہوںنے کہاکہ اس دور میں نہ صرف تیزی سے گرتی ہوئی معیشت کو سنبھالا گیا بلکہ بین الاقوامی محاذ پر بھی اہم پیش رفت ہوئی۔سینیٹر ذیشان خانزادہ نے کہاکہ کو رونا وبا کی وجہ سے دنیا کی بڑی بڑی معیشتیں بیٹھ گئیں اور اموات کی شرح میں خوفناک اضافہ ہوامگر وزیراعظم عمران خان کی فہم و فراست اور دور اندیشی کے نتیجے میں نہ صرف عوام کو بھوک سے بچایا گیا بلکہ بہترین حکمت عملی کے ذریعے خوفناک وبا پر بھی قابو پایا گیا۔