ویٹرنز فٹبال سپر کپ :ہم پیالہ اسپورٹس نے سر علی اصغر الیون کو شکست دیدی 

کراچی (پی پی آئی) سر علی اصغر ویٹرن الیون (B)کے زیر اہتمام ڈرگ یونین فٹبال اسٹیڈیم پرجشن آزادی ویٹرنز فٹبال سپر لیگ کا  انعقاد کیا گیا،جس کے فائنل میں ہم پیالہ اسپورٹس نے میزبان سائیڈسر علی اصغر ویٹرن الیون بی کو پنالٹی ککس پر3-1 سیشکست دے دی۔ڈرگ روڑ یونین فٹبال اسٹیڈیم میں جشن آزادی ویٹرنز فٹبال سپر لیگ کے پہلے سیمی فائنل میں ہم پیالہ اسپورٹس نے سر علی اصغر اے ٹیم کو 2-0سے شکست دی، فاتح ٹیم کی جانب سے رئیس احمد اور محمد خان نے ایک ایک گول اسکور کئے۔سر علی اصغر اے ٹیم میچ میں کوئی گول اسکور کرنے میں کامیاب نہیں ہوسکی۔دوسرے سیمی فائنل میں سر علی اصغر بی ٹیم نے انٹرنیشنل کراچی ٹیم کو دلچسپ اور سنسنی خیز مقابلے کے بعد2-1 سے ہرایا۔سر علی اصغر بی ٹیم کی جانب سے ایک گول صدیق نے اسکور کیا،جبکہ ایک گول اون اسکور کیا گیا۔ناکام سائیڈ کا واحد گول عثمان نے بنایا۔ فائنل میں ہم پیالہ اسپورٹس نے سر علی اصغر بی ٹیم کو مقررہ وقت میں مقابلہ ایک ایک گول سے برابر ہونے کے بعد پنالٹی ککس پر 3-1سے مات دیکر ٹرافی حاصل کی ۔میچ کے ریفری شوکت علی، اسسٹنٹ ریفریز، بابر،تنویر، میچ کمشنر رضا خان تھے۔ فائنل کے اختتام پرمہمان خصوصی انٹرنیشنل فٹبالر نیوی فرحان اور ضمیر الاسلام نے فاتح ٹیم کے کپتان محمود خان مودی کو ٹرافی پیش کی۔